Гэрлэх ёслолын ордонг татан буулгахгүй
2018 оны 8 сарын 29

НИТХ-ын дарга С.Амарсайхан “Гэрлэх ёслолын ордонг татан буулгана” гэж хэлсэн мэтээр түүнийг харлуулах гэсэн ээлжит захиалгат, гүтгэлгийн шинжтэй мэдээлэл цахим ертөнцөөр явж байна.

Тэрбээр “Нийслэлийн өмчит үйлдвэрийн газрын эзний хувиар Нийслэл асуудалд хандах ёстой. “Орон нутгийн өмчит 32 үйлдвэрийн газруудаас нийслэлд төвлөрүүлэх ногдол ашиг 30 хувь гэж байгааг хүлээн зөвшөөрөхгүй. Цаашид эдгээр газрууд менежментээ сайжруулж ногдол ашгаа 100 хувь Нийслэлд төвлөрүүлэх ёстой” гээд жишээ болгож Гэрлэх ёслолын ордны санхүүгийн баримтаас дурдсан байдаг.

“Гэрлэх ёслолын ордон” жилд 1,284 тэрбум төгрөгийн орлоготой ажилласан байна. Үүнээс зардал нь 963 сая төгрөг. Нийт цэвэр ашиг нь 321,220 сая төгрөг. Нийслэлд хуваарилах ногдол ашиг гэж жилдээ 29 сая төгрөгийг оруулсанд шүүмжлэлтэй ханджээ.

Түүний хэлсэн энэ үгийг сошиалаар мушгиж, Гэрлэх ёслолын ордонг татан буулгах гэж байгаа мэтээр зохион байгуулалттай гүтгэлэг мэдээг тараажээ.

Тухайн өдрийн Тэргүүлэгчдийн хурлаар Гэрлэх ёслолын ордонг татан буулгах тухай асуудал огт яригдаагүй бөгөөд цаашид ч яригдахгүй, яригдах ёсгүй гэдгийг хариуцлагатайгаар мэдэгдье.

Дашрамд дурдахад Нийслэлийн Орон нутгийн өмчит үйлдвэрийн газруудаас орлого нь өндөр байдаг атлаа нийслэлд маш бага орлого оруулдаг Төв цэнгэлдэх хүрээлэн, Гэрлэх ёслолын ордон, Соёлын төв өргөө, Улаанбаатар чуулга зэрэг байгууллагын менежмент сул байгаатай холбогдуулан НИТХ-ын хурлын тэргүүлэгчид тухайн хуралдаан дээр асуудалд шүүмжлэлттэй хандсан байдаг.

Тэргүүлэгчдийн хурлын видео болон аудио бичлэг, хурлын протоколтой хүссэн хэн бүхэн нээлттэй танилцаж болно.

С.Амарсайхан даргын “…Цаашид Нийслэлийн өмчит байгууллагууд ингэж ажиллахгүй. Бүх ногдол ашгийг нийслэлийн төсөвт төвлөрүүлнэ. 2019 онд эдгээр байгууллагуудыг яаж ажилладгийг харна. Ашиггүй ажилласан газрыг татан буулгах асуудлыг ярина. Ингэж аль аль талдаа хариуцлагатай ажиллах шаардлага байна” гэсэн үг нь Гэрлэх ёслолын ордонг хамаарахгүй бөгөөд учир нь Гэрлэх ёслолын ордон ашигтай ажилласан байгууллагуудын нэг. Гол нь ногдол ашгаа Нийслэлд төвлөрүүлэхгүй байгаа гэж шүүмжилсэн нь цөөнгүй хүний халаасыг хөндөж, түүнийг ингэж худал гүтгэхэд хүргэсэн бололтой.

НИТХ-ын хуралдааны эхэнд Нийслэлийн сонгуулийн хорооны бүрэлдэхүүнд өөрчлөлт оруулах тухай хэлэлцэв. Нийслэлийн Багахангай болон Баянзүрх дүүргүүдэд ирэх ес болон аравдугаар сард нөхөн сонгуулийн ажиллагаа явагдах болсон. Нийслэлийн сонгуулийн хорооны нарийн бичгийн дарга бөгөөд Нийслэлийн өмчийн харилцааны газрын орлогч дарга Т.Батдорж мөн Нийслэлийн сонгуулийн хорооны гишүүн Б.Мөнхцэцэг нар төрийн албанаас чөлөөлөгдсөн тул сонгуулийн хуулийн дагуу төрийн албаны төлөөллийг нөхөн томилох ёстой. Ажлын хэсэг уг асуудлаар хуралдан санал хурааж Нийслэлийн сонгуулийн хорооны  нарийн бичгийн даргаар Сүхбаатар дүүргийн ЗДТГ-ын Хуулийн хэлтсийн дарга П.Булгамааг, Баянгол дүүргийн ЗДТГ-ын Хуулийн хэлтсийн дарга П.Батбаярыг Сонгуулийн хорооны гишүүнээр нөхөн томилсон байна.

Хуралдааны хэлэлцэх асуудлын дарааллын дагуу Орон нутгийн өмчит үйлдвэрийн газруудын 2017 оны жилийн эцсийн цэвэр ашгаас 2018 онд нийслэлийн төсөвт төвлөрүүлэх ногдол ашгийн тухай танилцуулав. Нийслэлийн хэмжээнд 2017 онд 32 орон нутгийн өмчит үйлдвэрийн газрууд үйл ажиллагаа явуулснаас 20 нь орон нутгийн өмчит аж ахуйн тооцоот газар, 12 нь төсөвт үйлдвэрийн газар үйл ажиллагаа явуулжээ. Эдгээр аж ахуй нэгж нийт 246.4 тэрбум төгрөгийн орлого олж, 260.6 тэрбум төгрөгийн зардал гарган 16.2 тэрбум төгрөгийн алдагдалтай ажилласан байна. Ашигтай ажилласан аж ахуйн тооцоот үйлдвэрийн газрын нийт цэвэр ашиг нь 1.5 тэрбум төгрөгийн ашигтай ажилласнаас Нийслэлд оногдох ногдол ашгийн хэмжээ 480 сая төгрөг бөгөөд төсөвт төвлөрүүлэх ногдол ашгийн хэмжээ нь 440.334.300 төгрөгөөр батлуулахаар тогтоолын төсөл оруулав. Тэргүүлэгчдийн зүгээс төв цэнгэлдэх хүрээлэн, Гэрлэх ёслолын ордон, Соёлын төв өргөө, Улаанбаатар чуулга гэх зэрэг нийслэлийн өмчит байгууллагуудын орлого зарлагатай холбоотой асуултуудыг төсөл Нийслэлийн өмчийн харилцааны газрын хэлтсийн дарга н.Энхболдод тавьж, хариулт авч, асуудалд нэлээд шүүмжлэлттэй хандлаа.

НИТХ-ын дарга С.Амарсайхан Нийслэлийн нэрэн дор үйл ажиллагаа эрхэлдэг атлаа  нийслэлд ямарч үр өгөөжгүй, ашиггүй, ногдол ашиг өгдөг нэрээр жилийн 31 сая төгрөг өгдөг зарим нэг байгууллагыг байлгах шаардлагатай эсэхийг холбогдох албаныхнаас асуув. Тэрбээр байгууллагуудын орлого зарлагын төлөлтийг 2019 оны төсөвт өөр хувилбараар тавина. Орлогыг нь өсгөж, зарлагыг нь багасгах тал дээр анхаарч ажиллахыг үүрэгдэв.

Тэрбээр хэлэхдээ “Орон нутгийн өмчит үйлвэрийн газруудаас нийслэлд төвлөрүүлэх ногдол ашгийн 30 хувь гэж байгааг хүлээн зөвшөөрөхгүй. Нийт ногдол ашиг нь 1.6 тэрбум төгрөг байгаа. Бүгдийг нь нийслэл татаж авна. Тэр байгууллагуудад ямар нэгэн юм үлдээх шаардлагагүй. Жишээ дурьдвал “Гэрлэх ёслолын ордон” жилд 1.284 тэрбум төгрөгийн орлоготой ажилласан байна. Үүнээс зардал нь 963 сая төгрөг. Нийт цэвэр ашиг нь 321.220 сая төгрөг. Нийслэлд хувиарлах ногдол ашиг нь 29 сая төгрөг гэх мэтчилэн жил болгон байгууллагууд ингэж ажилладаг. Цаашид Нийслэлийн өмчит байгууллагууд ингэж ажиллахгүй. Бүх ногдол ашгийг нийслэлийн төсөвт төвлөрүүлнэ. 2019 онд эдгээр байгууллагуудыг яаж ажилладагыг харна. Ашиггүй ажилласан газрыг татан буулгах асуудлыг ярина.  Ингэж аль аль талдаа хариуцлагатай ажиллах шаардлага байна” гэв.

Тэргүүлэгч Ц.Байгалмаа Нийслэлийн өмчийн асуудлыг хэлэлцэж байгаатай холбогдуулан “Ашиггүй болон бага ашигтай ажиллаж байгаа нийслэлийн өмчит  газруудын менежментийг сайжруулах, үйл ажиллагааг нь шалгах, ашигтай ажиллаж чадсан байгууллагыг урамшуулдаг байдлаар тогтолцоог цаашид бий болгох ёстой” гэв.

Тэргүүлэгчидийн Нийслэлийн болон Орон нутгийн өмчит үйлдвэрийн газруудын ногдол ашгийн хувь хэмжээг  100 хувь  Нийслэлийн төсөвт төвлөрүүлэх санал дэмжигдлээ.

Хэлэлцэх асуудлын дараалалд багтсан бусад асуудлын хүрээнд Улаанбаатар хотыг нэг төвт хотоос олон төвт хот болгон төвлөрлийг сааруулах ажлын хүрээнд НИТХ, НЗДТГ, Улаанбаатар хотын захирагчийн ажлын алба, түүний харьяа байгууллагуудыг Хан-Уул дүүргийн 4,8 дугаар хорооны нутаг дэвсгэр “Яармаг” шинэ төвд шилжүүлэн байршуулах ажлыг зохион байгууллахаар болсон. Уг ажлын явцыг Нийслэлийн засаг даргын орлогч Ж.Батбаясгалан, Нийслэлийн Хот төлөвлөлт, ерөнхий төлөвлөгөөний газрын дарга Э.Анар нар танилцуулав. Одоогийн байдлаар гүйцэтгэх байгууллагыг сонгон шалгаруулсан бөгөөд зураг төслийн ажлыг хийж гүйцэтгэж, барилгын суурийн  ажлыг эхлүүлсэн тухай мэдээлэл хийв.

Хуралдааны төгсгөлд Нийслэл улаанбаатар хотыг элч дулаан, цахилгаан хангаж ирсэн “Дулааны IV цахилгаан станц” ТӨХК-ийн 35 жилийн ойг тохиолдуулан нийслэлийн хөгжил дэвшилд үнэтэй хувь нэмэр оруулсныг өндрөөр үнэлэн Нийслэлийн дээд шагнал болох  “Хангарди” одонгоор шагнах тогтоолын төслийг тэргүүлэгчид дэмжлээ.

НИТХ-ын ХМОНХТ

Хариулт үлдээх

Your email address will not be published.