Сэтгүүлчдэд мэдээлэл хүргэх эрх хязгаарлалттай байна
2020 оны 6 сарын 30

УИХ-ын Тамгын газар, ХМОНХХ-ээс 2020 оны энэ удаагийн анхдугаар чуулганыг сурвалжлах боломжийг сэтгүүлч нарт олгосонгүй. 

Сэтгүүлчдийг 11 цагт хоёрдугаар давхрын танхимд хашсан ба чуулганыг цэнхэр дэлгэцээр үзэж нэг ч гишүүнээс тодруулга ярилцлага авч чадалгүй өдрийг өнгөрөөсөн нь цаанаа үзэгч, уншигчдын мэдэх эрхэд халдаж байгаа хэрэг гэж сэтгүүлчид эсэргүүцлээ илэрхийлж байна.

Монгол HD телевизийн сэтгүүлч Б.Одонгарав: 

-Ганцхан өнөөдөр ч  биш, хорио цээрийн дэглэм эхэлснээс хойш бидний мэдээлэл авах эрх зөрчигдөж, ямар ч мэдээлэл авах боломжгүй болсон. УИХ-ын гишүүдийн үйл ажиллагаа ерөнхийдөө бидэнд хаалттай байна. У УИХ-ын гишүүд нь Тамгын газраар дамжуулж ярилцлага өгнө гэсэн боловч Тамгын газар үүргээ биелүүлдэггүй. Бидний дуудсанаар УИХ-ын гишүүд энд ирэхгүй. Ерөнхийдөө бол бид дэлгэцээр л дүрсээ бичихээс өөр аргагүй байдалд хүрч, иймэрхүү дүр зурагтай байна.

zuv.mn сайтын сэтгүүлч С.Отгонсүрэн: 

-УИХ-ын чуулганы нээлт 12 цагт эхэлсэн. Түүнээс хойш нэг ч сэтгүүлч гарч ирсэнгүй. Биднийг хязгаарлагдмал хүрээнд ажиллуулна гэдэг ард иргэд мэдээллийг хязгаарлагдмал авна гэсэн үг. Цар тахлын үе гэдгийг бид мэдэж байгаа. Иймд бид УОК-ын журмын дагуу ажиллаж чадна шүү дээ.

ТВ-9 телевизийн мэдээллийн албаны дарга Б.Ариунтуяа: 

-Хэвлэл мэдээлэл бол төр, ард түмний гүүр болж байдаг. УИХ-ын гишүүний тангарагаа өргөсөн хүмүүсийн ирэх дөрвөн жилийн зорилго, зорилт, хийх ажлын талаар мэдээлэх нь олон нийтэд хэрэгтэй мэдээлэл гэж бодож байна. Гэтэл УОК-ын шийдвэрийг гишүүд нь биелүүлдэггүй, тэврэлдэж, үнсэлдэж зөрчдөг, харин сэтгүүлчид биелүүлдэг байж болохгүй шүү дээ. 11 цагт Төрийн ордонд ирсэн. Одоо 16 цаг болж байна. Нэг ч хүнээс ярилцлага аваагүй л байна.

zarig.mn сайтын эрхлэгч Ц.Өнөрцэцэг: 

-Хэвлэлийн эрх чөлөө хэний гарт байгаа нь өнөөдөр харагдлаа. Эрх баригчид хэвлэлийн эрх чөлөөний дарангуйлагчид болсон байна. Энэ нь цаагуураа иргэдийн мэдэх эрхэд халдаж байгаа үйлдэл. Бид нар өдөржин энд хашигдаад сууж байхад гишүүд хөл хорионы журмаа мөрдөхгүй, зөрчөөд явж байна.

ТВ-5 телевизийн сэтгүүлч Ч.Доржбат: 

-Ордонд ирээд таван цаг болж байна. Нэг ч ярилцлагагүй сууж байна. УИХ-ын Тамгын газар энэ асуудлыг шийдэж өгөхгүй байна. Засгийн газрын Ц.Ганзориг дарга энэ асуудалд анхаарлаа хандуулаасай. Адилхан сэтгүүлч хүмүүс шүү дээ. УИХ өнөөдөр бүрдлээ. Удахгүй Засгийн газар бүрдэнэ. Үүнийг ард түмэндээ мэдээлмээр байна. Иргэдийн мэдэх эрхэд халдаж байна гэж ярьж байгаа нь туйлын зөв.